خلیجی راستوں میں غیر یقینی صورتحال : 2 پاکستانی جہازوں کو آبنائے ہرمز سے واپس موڑ دیا گیا

آبنائے ہرمز میں دو پاکستانی تجارتی جہازوں کو داخلے کے بعد واپس موڑ دیے جانے کی اطلاع سامنے آئی ہے، جس کے بعد خلیجی سمندری راستوں میں غیر یقینی صورتحال پیدا ہو گئی ہے۔

ذرائع کے مطابق پاکستان نیشنل شپنگ کے جہاز شالامار اور خیرپور کویت اور متحدہ عرب امارات کے لیے روانہ ہوئے تھے، جہاں انہیں کروڑوں لیٹر خام تیل لوڈ کرنا تھا۔

تاہم ہرمز کے اندر پہنچنے کے بعد دونوں جہازوں کو آگے بڑھنے سے روک دیا گیا، جس کے بعد کپتان آصف اور کپتان شاہین نے احکامات کے مطابق جہازوں کا رخ تبدیل کرتے ہوئے خلیج عمان کی طرف موڑ دیا۔

ذرائع کا کہنا ہے کہ ان جہازوں کے آئندہ ممکنہ روٹس میں فجیرا یا ینبوع شامل ہو سکتے ہیں، تاہم صورتحال کے حوالے سے حتمی تفصیلات سامنے نہیں آ سکیں۔