قرضے حکمران لیں اور واپس عوام کریں یہ ظلم ہے: حافظ نعیم الرحمان

امیر جماعت اسلامی پاکستان حافظ نعیم الرحمان نے موجودہ معاشی نظام کو ظالمانہ قرار دیتے ہوئے پیٹرولیم لیوی کے خلاف عدالت سے رجوع کرنے اور میئر کراچی کے خلاف تحریک عدم اعتماد لانے کا اعلان کر دیا ہے۔ کراچی میں پریس کانفرنس کرتے ہوئے انہوں نے کہا کہ حکمرانوں کے لیے گئے قرضوں کا بوجھ عوام پر ڈالنا سراسر ناانصافی ہے، جبکہ آئی پی پیز کے ساتھ کیے گئے ناجائز معاہدوں کی قیمت وہ عوام ادا کر رہے ہیں جنہیں بجلی میسر ہی نہیں۔

حافظ نعیم الرحمان نے کراچی کے انتظامی مسائل پر سندھ حکومت کو آڑے ہاتھوں لیتے ہوئے کہا کہ یونیورسٹی روڈ کی حالتِ زار پوری دنیا میں مذاق بن چکی ہے اور شہر میں کوئی بھی منصوبہ مکمل نہیں کیا جا رہا۔ انہوں نے 25 اپریل سے ملک بھر میں جماعت اسلامی کی رکنیت سازی مہم شروع کرنے کا اعلان بھی کیا۔ تعلیمی صورتحال پر تبصرہ کرتے ہوئے ان کا کہنا تھا کہ کروڑوں بچے اسکولوں سے باہر ہیں جبکہ حکومت سرکاری اسکولوں کو آؤٹ سورس کر رہی ہے۔

مشرقِ وسطیٰ کی صورتحال پر گفتگو کرتے ہوئے امیر جماعت اسلامی نے ایران کی قیادت کو جرات مندانہ مقابلے پر مبارکباد پیش کی اور کہا کہ امریکہ انسانیت دوستی نہیں بلکہ عالمی تنہائی اور اپنے نقصان کے باعث مذاکرات پر مجبور ہوا ہے۔ انہوں نے تجویز دی کہ پاکستان اور سعودی عرب کے دفاعی معاہدے میں ترکیہ اور ایران کو بھی شامل کیا جائے تاکہ خطے کا دفاع مضبوط ہو سکے۔ حافظ نعیم نے واضح کیا کہ غزہ اور ایران نے مل کر امریکی طاقت کے رعب کو کم کیا ہے اور وہ آبنائے ہرمز کے معاملے پر ایرانی موقف کی حمایت کرتے ہیں۔