امریکا ایران جنگ بندی پر اقوام عالم کا پاکستان سے اظہار تشکر

امریکا اور ایران کے درمیان حالیہ جنگ بندی کے لیے پاکستان کی مؤثر اور نتیجہ خیز سفارتکاری کو عالمی سطح پر بھرپور پذیرائی مل رہی ہے۔ چین، آسٹریلیا، سعودی عرب اور کینیڈا سمیت دنیا کے اہم ممالک نے اس بحران کے خاتمے کے لیے وزیراعظم شہباز شریف اور فیلڈ مارشل سید عاصم منیر کے احسن کردار کو سراہا ہے۔ آسٹریلوی وزیراعظم انتھونی البانیز، کینیڈین وزیراعظم مارک کارنی، اور آسٹرین چانسلر کرسچن سٹوکر نے تباہ کن اثرات رکھنے والی جنگ کو رکوانے پر پاکستان کا شکریہ ادا کرتے ہوئے اسے ایک عظیم سفارتی کامیابی قرار دیا ہے۔

سعودی عرب اور خلیجی ممالک کے علاوہ یورپی یونین، جرمنی، فرانس، اٹلی اور برطانیہ نے بھی مشترکہ بیانات میں پاکستان کی انتھک محنت اور غیر جانبدارانہ ثالثی کی تعریف کی ہے۔ جاپان، ملائیشیا، قازقستان اور نیوزی لینڈ کے وزرائے خارجہ نے پاکستان کے اس اقدام کو عالمی امن کے لیے ناگزیر قرار دیا ہے۔ عالمی تجزیہ کاروں کا کہنا ہے کہ انتہائی کشیدہ حالات میں امن کا راستہ نکالنا پاکستان کی مؤثر ملٹری ڈپلومیسی اور بہترین خارجہ پالیسی کا واضح ثبوت ہے، جس سے عالمی سطح پر بطور ایک ذمہ دار ریاست پاکستان کے اعتماد اور وقار میں غیر معمولی اضافہ ہوا ہے۔ ماہرین کے مطابق اس تاریخی کامیابی نے عالمی نقشے پر پاکستان کو امن کے ایک مضبوط علمبردار کے طور پر منوا لیا ہے۔