ایران امریکہ جنگ بندی میں پاکستان کا ثالثی کردار: 93 فیصد پاکستانیوں نے حمایت کر دی، گیلپ سروے جاری

اسلام آباد میں جاری ہونے والے حالیہ گیلپ سروے کے مطابق، ایران اور امریکہ کے درمیان جنگ بندی کروانے میں پاکستان کے سفارتی کردار کو عوامی سطح پر بھرپور پذیرائی حاصل ہوئی ہے۔ سروے کے نتائج بتاتے ہیں کہ 82 فیصد پاکستانی اس معاملے میں پاکستان کی کوششوں سے مکمل آگاہ ہیں، جو بین الاقوامی سفارت کاری میں عوامی دلچسپی کے اعلیٰ معیار کو ظاہر کرتا ہے۔ عوامی رائے عامہ کے مطابق، 93 فیصد افراد نے جنگ بندی کے لیے پاکستان کے بطور ثالث کردار کی حمایت کی ہے، جبکہ 72 فیصد شہریوں نے اس اقدام کی بھرپور تائید کرتے ہوئے اسے ملک کی خارجہ پالیسی کی بڑی کامیابی قرار دیا ہے۔

سروے میں مزید انکشاف ہوا ہے کہ 88 فیصد پاکستانی اس حق میں ہیں کہ پاکستان کو عالمی تنازعات کے حل میں اسی طرح فعال اور مثبت کردار ادا کرنا چاہیے۔ اس کے علاوہ، 80 فیصد شہری اس امید کا اظہار کر رہے ہیں کہ حالیہ جنگ بندی خطے میں مستقل امن کی طرف ایک اہم قدم ثابت ہوگی۔ ماہرین کا کہنا ہے کہ گیلپ سروے کے یہ اعداد و شمار ثابت کرتے ہیں کہ قوم نہ صرف عالمی امن کے لیے حکومت کی کوششوں کو سراہتی ہے بلکہ پاکستان کو عالمی سطح پر ایک بااثر سفارتی قوت کے طور پر دیکھنے کی خواہاں ہے۔