محمد اورنگزیب کی سربراہ سعودی فنڈ سے ملاقات، اقتصادی تعاون بڑھانے پر اتفاق

وفاقی وزیر خزانہ سینیٹر محمد اورنگزیب نے واشنگٹن ڈی سی میں ورلڈ بینک اور آئی ایم ایف کے بہار اجلاس 2026 کے موقع پر سعودی فنڈ برائے ترقی (SFD) کے چیف ایگزیکٹو آفیسر سلطان بن عبدالرحمان المرشد سے ایک اہم ملاقات کی ہے۔ اس ملاقات میں پاکستان کے ترقیاتی منصوبوں میں سعودی عرب کے کلیدی کردار اور مستقبل میں اقتصادی تعاون کو مزید وسعت دینے کے حوالے سے تفصیلی بات چیت کی گئی۔ وزیر خزانہ نے پاکستان کی معاشی ترقی کے لیے سعودی فنڈ برائے ترقی کی مسلسل اور بھرپور معاونت پر سعودی قیادت کا شکریہ ادا کیا۔

ملاقات کے دوران مشرقِ وسطیٰ کی موجودہ صورتحال اور وہاں جاری عسکری کشیدگی کے عالمی توانائی کی سلامتی (Energy Security) پر پڑنے والے اثرات پر بھی غور کیا گیا۔ وزیر خزانہ نے تشویش ظاہر کرتے ہوئے کہا کہ اس تنازع کے ممکنہ معاشی نتائج پوری دنیا بالخصوص ترقی پذیر ممالک کے لیے چیلنجنگ ہو سکتے ہیں۔ انہوں نے خطے میں پائیدار امن کی ضرورت پر زور دیتے ہوئے امید ظاہر کی کہ اس بحران کا جلد اور پرامن سفارتی حل تلاش کر لیا جائے گا تاکہ عالمی سپلائی چین اور توانائی کی قیمتوں میں استحکام آ سکے۔

فریقین نے پاکستان اور سعودی عرب کے درمیان دیرینہ برادرانہ تعلقات کو نئی بلندیوں تک لے جانے اور باہمی اعتماد پر مبنی شراکت داری کو مزید مستحکم کرنے کے عزم کا اعادہ کیا۔ وزیر خزانہ نے سعودی عرب کے وزیر خزانہ کے ساتھ اپنی حالیہ نشست کا حوالہ دیتے ہوئے کہا کہ دونوں ممالک معاشی استحکام کے لیے ایک دوسرے کے ساتھ قریبی رابطے میں ہیں۔ ملاقات کے اختتام پر پاکستان میں جاری مختلف ترقیاتی منصوبوں کی رفتار تیز کرنے اور نئے شعبوں میں سرمایہ کاری کے مواقع تلاش کرنے پر اتفاق کیا گیا۔