سعودیہ کی مالی معاونت بیرونی مالی پوزیشن کو مزید مضبوط کرے گی: وزیر خزانہ

وفاقی وزیر خزانہ محمد اورنگزیب نے واشنگٹن میں ورلڈ بینک اور آئی ایم ایف کے بہار کے اجلاسوں کے موقع پر عالمی ریٹنگ ایجنسی ‘موڈیز’ کے نمائندوں سے اہم ملاقات کی، جس میں پاکستان کی معاشی صورتحال اور عالمی مالیاتی منڈیوں میں دوبارہ رسائی کی حکمت عملی پر تفصیلی تبادلہ خیال کیا گیا۔

ملاقات کے دوران وزیر خزانہ نے واضح کیا کہ پاکستان نے یورو بانڈ کی ادائیگی کامیابی سے مکمل کر لی ہے، جو ملکی معیشت کے استحکام کی جانب ایک مثبت قدم ہے۔ انہوں نے اس بات پر زور دیا کہ حکومت تمام قرض دہندگان کی ذمہ داریاں بروقت پوری کرنے کے لیے پرعزم ہے۔ محمد اورنگزیب نے سعودی عرب کی جانب سے ملنے والی مالی معاونت کو انتہائی اہم قرار دیتے ہوئے کہا کہ اس سے پاکستان کی بیرونی مالی پوزیشن مزید مستحکم ہوگی۔

وزیر خزانہ نے مزید کہا کہ حکومت عالمی مالیاتی منڈیوں میں دوبارہ قدم جمانے کے لیے درمیانی مدت کی ایک جامع حکمت عملی پر عمل پیرا ہے۔ انہوں نے موجودہ علاقائی صورتحال کے تناظر میں توانائی کے شعبے میں کی جانے والی اصلاحات اور حکومتی اقدامات سے بھی شرکاء کو آگاہ کیا، تاکہ عالمی سرمایہ کاروں کا اعتماد بحال کیا جا سکے۔