عالمی معیشت مسلسل جھٹکوں کے باعث دباؤ کا شکار ہے، وزیرخزانہ محمد اورنگزیب کا جی 24اجلاس سے خطاب

وفاقی وزیر خزانہ سینیٹر محمد اورنگزیب نے ورلڈ بینک اور آئی ایم ایف کے بہار اجلاس 2026 کے دوران  اپنی مصروفیات کا آغاز جی-24 کے وزرائے خزانہ اور مرکزی بینک کے گورنرز کے اجلاس میں شرکت سے کیا۔

جی-24 کے فرسٹ وائس چیئر کے طور پر اپنے خطاب میں وزیر خزانہ نے کہا کہ  مشرق وسطیٰ کی کشیدگی نے توانائی، کھاد اور مالیاتی حالات پر گہرے اثرات ڈالے ہیں۔ انہوں نے کشیدگی میں کمی، اہم بحری اور توانائی راستوں کے تحفظ اور پائیدار امن کی کوششوں کی اہمیت پر زور دیا ۔

وزیرخزانہ نے آئی ایم ایف پروگرام کے ڈیزائن اور شرائط کے جاری جائزے کی حمایت کرتے ہوئے کہا کہ معاشی استحکام کے بنیادی اصولوں کو برقرار رکھتے ہوئے ایسی لچک بھی ہونی چاہیے جو اہم معاشی خطرات سے نمٹنے اور ترقی و روزگار کے اہداف کے حصول میں مدد دے سکے۔

وزیر خزانہ نے آئی ایم ایف کے سرچارجز کے جلد اور جامع جائزے کی ضرورت پر بھی زور دیا اور اسے ترقی پذیر ممالک کے لیے اہم قرار دیا۔