خیبر پختونخوا میں شدید بارشیں: فرنٹیئر کور مقامی افراد کی مدد کیلئے کوشاں

خیبر پختونخوا کے مختلف اضلاع میں ہونے والی حالیہ شدید بارشوں کے بعد فرنٹیئر کور (ایف سی) خیبر پختونخوا نارتھ کے جوان متاثرہ مقامی آبادی کی مدد کے لیے پیش پیش ہیں۔ مسلسل بارشوں کے باعث باجوڑ، چترال اور دیگر علاقوں میں سڑکوں، پلوں اور مکانات کو پہنچنے والے شدید نقصان کی وجہ سے مقامی شہریوں کو سخت مشکلات کا سامنا کرنا پڑا۔ اس نازک صورتحال میں ایف سی نارتھ کے جوانوں نے فوری ردِعمل ظاہر کرتے ہوئے متاثرہ علاقوں میں ریسکیو آپریشن شروع کیا اور شہریوں کو بحفاظت محفوظ مقامات پر منتقل کیا۔

امدادی کارروائیوں کے دوران ایف سی کے جوانوں نے نہ صرف متاثرین کو ضروری طبی امداد فراہم کی بلکہ ان میں کھانے پینے کی اشیاء اور دیگر بنیادی ضروریاتِ زندگی بھی تقسیم کیں۔ مقامی آبادی نے سیکیورٹی فورسز کے اس جذبہِ خدمت اور بروقت اقدامات کو بھرپور طریقے سے سراہا ہے۔ ایف سی نارتھ کے ترجمان کا کہنا ہے کہ فورسز نے ایک بار پھر ثابت کر دیا ہے کہ وہ نہ صرف ملکی سرحدوں کے دفاع بلکہ قدرتی آفات کے دوران عوامی فلاح و بہبود اور انسانیت کی خدمت کے لیے بھی ہمہ وقت تیار اور پرعزم ہیں۔