عوام کومہنگائی کا ایک اورجھٹکا، بجلی ایک روپے42پیسے فی یونٹ مہنگی

مہنگائی کے مارے عوام کو بجلی کا ایک اور جھٹکا۔ بجلی فی یونٹ ایک روپے 42 پیسے مہنگی کردی گئی۔ نیشنل الیکٹرک پاور ریگولیٹری اتھارٹی نیپرا نے نوٹیفکیشن جاری کر دیا ۔

نوٹیفکیشن کے مطابق بجلی کی قیمتوں میں اضافہ فروری کی ماہانہ فیول کاسٹ ایڈجسٹمنٹ کی مد میں کیا گیا، قیمتوں میں اضافے سے متعلق رقم اپریل کے بجلی بلوں میں صارفین سے وصول کی جائے گی۔

ذرائع کے مطابق سی پی پی اے نے بجلی کی قیمت میں 1 روپے 62 پیسے فی یونٹ اضافے کی درخواست دی تھی، جس پر نیپرا نے سماعت مکمل کرنے کے بعد 1 روپے 42 پیسے اضافے کی منظوری دی۔

واضح رہے اِس سے قبل جنوری میں فیول ایڈجسٹمنٹ کے تحت بجلی کی قیمت میں 1.63 روپے فی یونٹ اضافہ ہوا تھا۔