پنجاب حکومت ہر ورکر کی صحت، بہبود اور حفاظت کیلئے پرعزم ہے: مریم نواز

وزیراعلیٰ پنجاب مریم نواز شریف نے عالمی یومِ تحفظِ صحت و سلامتی کے موقع پر اپنے پیغام میں مزدوروں کی فلاح و بہبود اور کام کی جگہوں پر ان کی سلامتی کو یقینی بنانے کے عزم کا اعادہ کیا ہے۔ انہوں نے لیبر ڈیپارٹمنٹ کو ہدایت کی ہے کہ فیکٹریوں اور دفاتر میں حفاظتی آلات اور سیفٹی قوانین کی خلاف ورزی کرنے والوں کے خلاف سخت قانونی کارروائی کی جائے۔ مریم نواز نے اعلان کیا کہ ملازمین کے تحفظ کے لیے لیبر قوانین میں ترامیم لائی جا رہی ہیں اور راشن کارڈ کے ذریعے 14 لاکھ مزدوروں کو ماہانہ مالی معاونت فراہم کی جا رہی ہے، جس میں مزید 50 ہزار ورکرز کا اضافہ کیا جائے گا۔ وزیراعلیٰ نے واضح کیا کہ ورک فورس ملک کا قیمتی اثاثہ ہے، اس لیے جو کمپنیاں حفاظتی معیار کو نظر انداز کریں گی انہیں بھاری جرمانوں کا سامنا کرنا پڑے گا۔