چاغی: نامعلوم مسلح افراد کے حملے میں نجی کمپنی کے 10 افراد جاں بحق، 5 زخمی

بلوچستان کے ضلع چاغی میں دالبندین کے قریب سرحدی علاقے دریگون میں گزشتہ شب نامعلوم مسلح افراد نے ایک نجی کمپنی کے کیمپ پر حملہ کر کے 10 افراد کو ہلاک اور 5 کو زخمی کر دیا۔ سکیورٹی ذرائع کے مطابق یہ حملہ پاک افغان سرحد کے قریب اس مقام پر ہوا جہاں ‘این آر ایل’ نامی کمپنی تانبے اور سونے کی تلاش کے منصوبے پر کام کر رہی تھی۔

حملہ آوروں نے شام تقریباً 6 بجے اچانک فائرنگ شروع کی اور وہاں موجود تیل کے ذخیرے کو آگ لگا دی۔ اسپتال ذرائع کے مطابق دالبندین کے پرنس فہد اسپتال میں اب تک 10 لاشیں منتقل کی جا چکی ہیں۔ جاں بحق ہونے والوں میں ایک ترک باشندہ بھی شامل ہے، جبکہ دیگر میں دو مقامی حفاظتی اہلکار اور ملک کے مختلف علاقوں سے تعلق رکھنے والے ورکرز شامل ہیں۔ رپورٹ کے مطابق 6 افراد آگ لگنے سے جھلس کر جاں بحق ہوئے جبکہ 4 افراد فائرنگ کا نشانہ بنے۔

واقعے کے فوراً بعد سکیورٹی فورسز نے علاقے کو گھیرے میں لے کر بڑے پیمانے پر سرچ آپریشن شروع کر دیا ہے۔ سرکاری حکام نے حملے کی تصدیق کی ہے تاہم سکیورٹی کلیئرنس مکمل ہونے تک مزید تفصیلات فراہم نہیں کی گئیں۔ اس ہولناک واقعے کے بعد پورے علاقے میں خوف و ہراس پھیل گیا ہے اور سکیورٹی کو انتہائی ہائی الرٹ کر دیا گیا ہے۔