ججز کا تبادلہ عدلیہ پر دباؤ اور مداخلت ہے، 50 سال میں پہلی بار بغیر رضامندی منتقلی ہو رہی ہے؛ بیرسٹر گوہر

پاکستان تحریک انصاف کے چیئرمین بیرسٹر گوہر خان نے اسلام آباد ہائیکورٹ کے پانچ ججز کے دیگر صوبوں میں تبادلے کے فیصلے کو غیر منصفانہ قرار دیتے ہوئے اسے عدلیہ کی آزادی پر حملہ قرار دیا ہے۔ سوشل میڈیا ویب سائٹ ایکس پر اپنے ایک بیان میں بیرسٹر گوہر نے اعتراض اٹھایا کہ گزشتہ پچاس سالوں میں پہلی بار ججز کی رضامندی کے بغیر ان کی منتقلی کی جا رہی ہے، جو کہ عدلیہ پر دباؤ اور کھلی مداخلت کے مترادف ہے۔ انہوں نے واضح کیا کہ سیاسی کمیٹی میں شامل اپوزیشن ارکان جوڈیشل کمیشن کے اجلاس میں شرکت کریں گے، جبکہ وہ خود اور سینیٹر علی ظفر بھی آج ہونے والے کمیشن کے اہم اجلاس میں شریک ہو کر اپنا موقف پیش کریں گے۔