وزیر خزانہ محمد اورنگزیب عالمی مالیاتی اجلاسوں میں شرکت کیلئے امریکہ پہنچ گئے

وفاقی وزیر خزانہ محمد اورنگزیب عالمی بینک اور عالمی مالیاتی فنڈ کے اجلاسوں میں شرکت کے لیے امریکہ کے شہر بوسٹن پہنچ گئے ہیں، جہاں ان کا استقبال امریکہ میں پاکستان کے سفیر رضوان سعید شیخ اور سفارتی عملے نے کیا۔

وزارت خزانہ کے مطابق وزیر خزانہ اپنے دورہ امریکہ کے دوران ہارورڈ یونیورسٹی میں منعقد ہونے والی پاکستان کانفرنس میں شرکت کریں گے اور اہم خطاب بھی کریں گے۔

محمد اورنگزیب نے بوسٹن میں ہارورڈ گروتھ لیب کی ٹیم سے اہم ملاقات کی، جس میں معروف ماہر اقتصادیات پروفیسر ریکارڈو ہاؤس مین اور دیگر ماہرین بھی شریک تھے۔ ملاقات کے دوران پاکستان کی معیشت، جاری اصلاحات اور مستقبل کی ترقی کے امکانات پر تفصیلی تبادلہ خیال کیا گیا۔

وزیر خزانہ نے ماہرین کے ساتھ پائیدار معاشی ترقی کے مواقع اور پالیسی اقدامات پر بھی گفتگو کی۔ وزارت خزانہ کے مطابق وہ پاکستان کانفرنس کے موقع پر ماہرین، پالیسی سازوں اور بیرون ملک مقیم پاکستانیوں سے ملاقاتیں بھی کریں گے۔

دورے کے دوران وزیر خزانہ پاکستان کے معاشی وژن اور اصلاحاتی ایجنڈے پر بریفنگ دیں گے اور سرمایہ کاری کے مواقع اجاگر کریں گے۔