پہلگام واقعہ کے ایک سال بعد بھی بھارت شواہد پیش نہ کر سکا: عطاء اللہ تارڑ

وفاقی وزیر اطلاعات و نشریات عطاء اللہ تارڑ نے پہلگام فالس فلیگ آپریشن کو ایک سال مکمل ہونے پر بھارتی موقف کو کڑی تنقید کا نشانہ بناتے ہوئے کہا ہے کہ بھارت آج تک اس واقعے کے حوالے سے کوئی بھی ٹھوس ثبوت پیش کرنے میں ناکام رہا ہے۔ اسلام آباد میں میڈیا سے گفتگو کرتے ہوئے انہوں نے اس واقعے کو بھارتی “مکاری، جھوٹی انا اور تکبر” کی عکاسی قرار دیا اور واضح کیا کہ بھارت اپنی اندرونی ناکامیوں اور دہشت گردی کے مسائل کو بیرونی رنگ دے کر عالمی برادری کو گمراہ کرنے کی کوشش کرتا رہا ہے، مگر اب اس کی حقیقت دنیا کے سامنے کھل کر آ چکی ہے۔

وزیر اطلاعات نے واقعے کی قانونی حیثیت پر سوال اٹھاتے ہوئے انکشاف کیا کہ پہلگام آپریشن کی ایف آئی آر محض 10 منٹ کے اندر درج کر لی گئی تھی، جو اس بات کا واضح ثبوت ہے کہ اس کا متن پہلے سے تیار تھا اور یہ ایک سوچی سمجھی سازش کا حصہ تھا۔ انہوں نے مزید کہا کہ عالمی میڈیا اور خود بھارتی سول سوسائٹی اور تھنک ٹینکس نے بھی اس واقعے پر سنجیدہ سوالات اٹھائے ہیں۔ عطاء اللہ تارڑ نے یاد دلایا کہ وزیراعظم پاکستان نے اس معاملے کی آزادانہ اور غیر جانبدارانہ تحقیقات کی پیشکش کر رکھی ہے، تاکہ حقائق دنیا کے سامنے آ سکیں۔