روس کی ایران امریکا کشیدگی کم کرانے کے لیے ثالثی کی نئی پیشکش

روس نے ایران اور امریکہ کے درمیان جاری کشیدگی کو کم کرنے اور خلیجی خطے میں کسی بھی بڑی فوجی کشیدگی کو روکنے کے لیے ایک بار پھر نئی سفارتی کوششیں شروع کرنے کا باضابطہ اعلان کر دیا ہے۔

عرب میڈیا (الجزیرہ) کے مطابق کریملن کے ترجمان کا کہنا ہے کہ اگر تہران اور واشنگٹن کی جانب سے باضابطہ درخواست کی جائے تو روس دونوں ممالک کے درمیان مؤثر ثالثی کا کردار ادا کرنے کے لیے مکمل طور پر تیار ہے۔ روس کا مقصد خطے میں جاری فوجی تناؤ کو مزید بڑھنے سے روکنا اور فریقین کو مذاکرات کی میز پر لانا ہے۔ کریملن کے ترجمان نے مزید تجویز پیش کی کہ اگر ایران کے افزودہ یورینیم کا معاملہ دونوں ملکوں کے درمیان جوہری مذاکرات میں سب سے بڑی رکاوٹ بنا ہوا ہے، تو روس اسے اپنے پاس محفوظ رکھنے کے لیے اپنے ہاں وصول کرنے کے لیے بھی تیار ہے۔

ترجمان کے مطابق، ایران کا یہ معاملہ روس اور امریکہ کے درمیان اعلیٰ سطحی رابطوں میں باقاعدگی سے زیرِ بحث آتا رہتا ہے اور دونوں عالمی طاقتیں اس حوالے سے اپنے اپنے مؤقف کا مسلسل تبادلہ کرتی ہیں۔ واضح رہے کہ روس اس سے قبل بھی ایران کے افزودہ یورینیم کو اپنی سرزمین پر منتقل کر کے محفوظ رکھنے اور دیرینہ جوہری تنازع کے حل میں مدد دینے کی پیشکش کر چکا ہے، تاہم گزشتہ اپریل کے دوران روسی حکام نے انکشاف کیا تھا کہ امریکہ نے ایرانی یورینیم کو روس منتقل کرنے کی اس تجویز کو مسترد کر دیا تھا۔ روس کی جانب سے ثالثی اور خطے میں کشیدگی کم کرنے کی اس تازہ پیشکش پر تاحال نہ تو ایران اور نہ ہی امریکہ کی حکومتوں کی جانب سے کوئی ردعمل سامنے آیا ہے۔ ماہرین کے مطابق تہران اور واشنگٹن کے درمیان جوہری پروگرام اور خطے کے دیگر امور پر بنیادی اختلافات بدستور برقرار ہیں، جب کہ ماسکو اپنے اثر و رسوخ اور سفارتی رابطوں کے ذریعے اس تنازع کے پرامن حل کا خواہاں ہے۔