ٹک ٹاک کی 2026 کی دوسری سہ ماہی رپورٹ جاری: پاکستان میں کمیونٹی گائیڈلائنز کی خلاف ورزی پر 2 کروڑ 32 لاکھ سے زائد ویڈیوز حذف

مقبول ترین شارٹ ویڈیو پلیٹ فارم ’ٹک ٹاک‘ نے سال 2026 کی دوسری سہ ماہی کے لیے کمیونٹی گائیڈلائنز کے نفاذ سے متعلق اپنی جامع رپورٹ جاری کر دی ہے، جس کے مطابق اپریل سے جون 2026 کے دوران صرف پاکستان میں قواعد کی خلاف ورزی کرنے پر 2 کروڑ 32 لاکھ سے زائد ویڈیوز حذف کی گئیں۔

رپورٹ کے اعداد و شمار کے مطابق، پاکستان میں اس دوران مجموعی طور پر 2 کروڑ 32 لاکھ 43 ہزار 711 ویڈیوز ہٹائی گئیں، جن میں ویڈیوز حذف کرنے کی شرح 1.1 فیصد رہی۔ خوش آئند بات یہ ہے کہ حذف کی گئی کل ویڈیوز میں سے 99.7 فیصد کی نشاندہی خودکار نظام کے تحت پیشگی طور پر ہی کر کے انہیں ہٹا دیا گیا، جبکہ 94.5 فیصد ویڈیوز کے جی محض 24 گھنٹوں کے اندر اندر ڈیلیٹ کر دی گئیں۔ اس کے علاوہ، مزید جائزے کے بعد غلطی سے ہٹائی جانے والی 5 لاکھ 19 ہزار 75 ویڈیوز کو بحال بھی کر دیا گیا۔

عالمی سطح پر بات کی جائے تو اسی سہ ماہی کے دوران دنیا بھر سے 18 کروڑ 82 لاکھ سے زائد ویڈیوز پلیٹ فارم سے ہٹائی گئیں، جن میں سے 99.5 فیصد کی نشاندہی جدید خودکار ٹیکنالوجی کے ذریعے کی گئی۔ عالمی سطح پر بھی 92.7 فیصد خلاف ورزی کرنے والا مواد 24 گھنٹوں کے اندر حذف کیا گیا، جبکہ نظرثانی کے بعد 62 لاکھ 62 ہزار سے زائد ویڈیوز بحال کی گئیں۔ رپورٹ میں یہ بھی انکشاف کیا گیا ہے کہ ٹک ٹاک نے اس عرصے میں دنیا بھر میں 14 کروڑ 68 لاکھ سے زائد جعلی اکاؤنٹس کے ساتھ ساتھ 2 کروڑ 68 لاکھ سے زیادہ ایسے اکاؤنٹس بھی بند کیے جن کے بارے میں شبہ تھا کہ وہ 13 سال سے کم عمر بچوں کے زیرِ استعمال تھے۔ حذف شدہ عالمی مواد میں 19.5 فیصد حساس یا بالغوں کے لیے مخصوص موضوعات، 16.1 فیصد ذہنی صحت و رویوں، 13.8 فیصد جسم کی نمائش اور جنسی نوعیت کے مواد، 13.5 فیصد خطرناک سرگرمیوں اور چیلنجز، جبکہ 1.8 فیصد مصنوعی ذہانت سے تیار کردہ (AIGC) مواد پر مشتمل تھا۔ ٹک ٹاک کا کہنا ہے کہ شفافیت کو فروغ دینے کے لیے یہ رپورٹس اردو اور انگریزی دونوں زبانوں میں ٹرانسپیرنسی سینٹر پر دستیاب ہیں۔