حکومت اور پی ٹی آئی قیادت کے درمیان مذاکرات آج ہوں گے

حکمران اتحاد (وفاقی حکومت اور پاکستان پیپلز پارٹی) اور پاکستان تحریک انصاف (پی ٹی آئی) کی قیادت کے درمیان موجودہ سیاسی تناؤ اور کشیدہ صورتحال کو کم کرنے کے لیے اہم مذاکرات اج متوقع ہیں۔ اس سلسلے میں وفاقی حکومت اور پیپلز پارٹی کے رہنماؤں پر مشتمل ایک مشترکہ کمیٹی تشکیل دے دی گئی ہے، جو پی ٹی آئی کی قیادت سے بات چیت کرے گی۔ اس کمیٹی میں وفاقی وزراء محسن نقوی، رانا ثناء اللہ، امیر مقام کے علاوہ پیپلز پارٹی کی نمائندگی کرتے ہوئے سینیٹر شیری رحمان، سید نوید قمر اور اعجاز جاکھرانی شامل ہیں۔

اس پیش رفت کا فیصلہ ایوانِ صدر میں صدر مملکت آصف علی زرداری اور وزیراعظم محمد شہباز شریف کے درمیان ہونے والی ایک اہم اور اعلیٰ سطحی ملاقات کے بعد کیا گیا، جس میں ملک کی مجموعی سیاسی صورتحال اور بالخصوص خیبر پختونخوا میں امن و امان کے مسائل پر تشویش کا اظہار کیا گیا۔ ایوانِ صدر سے جاری کردہ اعلامیے کے مطابق ملاقات میں ملک میں امن و استحکام کو فروغ دینے، دہشت گردی کا مؤثر مقابلہ کرنے اور قومی یکجہتی کے لیے سیاسی رہنماؤں کے درمیان رابطے بڑھانے پر اتفاق کیا گیا۔