سیرتِ محمدیؐ کو اپنی انفرادی اور اجتماعی زندگی کا حصہ بنانا ہو گا، مریم نواز

وزیراعلیٰ پنجاب مریم نواز شریف نے عید میلاد النبی ﷺ کے مبارک موقع پر پوری امتِ مسلمہ کو مبارکباد دیتے ہوئے کہا ہے کہ سرورِ کائنات حضرت محمد مصطفیٰ ﷺ کی ولادتِ باسعادت عالمِ انسانیت کے لیے اللہ تعالیٰ کا سب سے بڑا انعام ہے۔ اپنے پیغام میں انہوں نے کہا کہ نبی کریم ﷺ نے مظلوموں، یتیموں، غلاموں اور بیٹیوں کو عزت و وقار عطا کیا اور آپ ﷺ کی تعلیمات نے معاشرے کو عدل، رحم، مساوات اور احترامِ انسانیت کا راستہ دکھایا۔ مریم نواز نے اس بات پر زور دیا کہ نبی اکرم ﷺ سے محبت کا حقیقی تقاضا یہی ہے کہ ہم آپ ﷺ کے اسوۂ حسنہ اور سیرتِ طیبہ کو اپنی انفرادی اور اجتماعی زندگی کا حصہ بنائیں اور معاشرے میں محبت، اخوت اور رواداری کے فروغ کے لیے اپنا مثبت کردار ادا کریں۔