ملک بھر میں بارشوں کے نئے سلسلے کی پیشگوئی؛ مغربی ہوائیں کل سے داخل ہوں گی، 5 مئی تک الرٹ جاری

محکمہ موسمیات کے مطابق مغربی ہواؤں کا ایک طاقتور سلسلہ 2 مئی کی شام سے پاکستان کے شمال مغربی علاقوں میں داخل ہو رہا ہے۔ اس سسٹم کے زیرِ اثر ملک کے بالائی اور وسطی علاقوں میں گرج چمک، آندھی اور وقفے وقفے سے بارش کا امکان ہے جو 5 مئی تک جاری رہ سکتا ہے۔ اسلام آباد، راولپنڈی، مری، گلیات اور خطہ پوٹھوہار سمیت پنجاب کے بیشتر اضلاع میں 2 سے 4 مئی کے دوران موسم ابر آلود رہنے اور بارش کی توقع ہے۔ اس کے علاوہ بلوچستان، کشمیر اور گلگت بلتستان میں بھی تیز ہواؤں اور آندھی کے ساتھ بارش کی پیشگوئی کی گئی ہے۔