صدر مملکت اور وزیراعظم کی محنت کشوں کے وقار و تحفظ کو یقینی بنانے کی اپیل

صدر مملکت آصف علی زرداری اور وزیراعظم شہباز شریف نے عالمی یومِ مزدور پر اپنے الگ الگ پیغامات میں کاروباری برادری اور صنعتکاروں سے اپیل کی ہے کہ وہ مزدوروں کے وقار اور تحفظ کو ہر صورت یقینی بنائیں۔ صدر زرداری نے اپنے پیغام میں کہا کہ مزدوروں کا تحفظ دراصل قوم کے مستقبل کا تحفظ ہے اور پاکستان جبری مشقت و چائلڈ لیبر کے خاتمے سمیت بین الاقوامی معیارات برقرار رکھنے کے لیے پرعزم ہے۔ دوسری جانب وزیراعظم شہباز شریف نے ملکی اور سمندر پار پاکستانی محنت کشوں کو قومی معیشت کا ستون قرار دیتے ہوئے کہا کہ ان کی محنت سے حاصل ہونے والا زرمبادلہ ملکی اساس ہے۔ انہوں نے وفاقی حکومت کی جانب سے مزدوروں کی پیشہ ورانہ مہارت بڑھانے کے لیے خصوصی اقدامات کا بھی اعادہ کیا۔