پاکستان سمیت دنیا بھر میں آج یوم مزدور منایا جارہا ہے

آج یکم مئی کو دنیا بھر میں مزدوروں کے حقوق کے تحفظ اور ان کی قربانیوں کو یاد کرنے کے لیے عالمی یومِ مزدور منایا جا رہا ہے۔ اس دن کا آغاز 1886 میں امریکہ کے شہر شکاگو سے ہوا، جہاں پولیس نے اپنے حقوق کے لیے احتجاج کرنے والے مزدوروں پر فائرنگ کر کے انہیں لہو لہان کر دیا تھا۔ پاکستان میں اس دن کو منانے کی باقاعدہ شروعات 1972-73 میں ذوالفقار علی بھٹو کے دور میں ہوئی تھی۔ تاہم، آج بھی صورتحال یہ ہے کہ ایک طرف تقریبات اور ریلیاں نکالی جا رہی ہیں، تو دوسری طرف غریب مزدور اس دن کی اہمیت سے بے خبر اپنے بچوں کا پیٹ پالنے کے لیے محنت مزدوری میں جتا ہوا ہے۔ مزدور رہنماؤں نے مطالبہ کیا ہے کہ کم از کم اجرت پر عمل درآمد یقینی بنایا جائے اور پارلیمنٹ میں محنت کشوں کے لیے مخصوص نشستیں مختص کی جائیں تاکہ ان کے مسائل کے حل کے لیے موثر قانون سازی ہو سکے۔