اڈیالہ جیل کے باہر ڈرامائی صورتحال؛ پی ٹی آئی رہنماؤں کو داہگل ناکہ پر روک لیا گیا

راولپنڈی میں اڈیالہ جیل کے باہر اس وقت کشیدگی دیکھنے میں آئی جب پولیس نے پی ٹی آئی رہنماؤں سلمان اکرم راجہ، علی محمد خان اور سینیٹر ہمایوں مہمند کو داہگل ناکہ پر روک لیا۔ پی ٹی آئی رہنما اپنے موکل سے ملاقات کے لیے عدالتی احکامات کے ہمراہ جیل جا رہے تھے۔ اس موقع پر علی محمد خان اور پولیس افسران کے درمیان شدید تلخ کلامی ہوئی، جہاں علی محمد خان نے سوال اٹھایا کہ “آپ ہمیں کس قانون کے تحت روک رہے ہیں؟” انہوں نے مزید کہا کہ پارلیمنٹ میں قانون ہم بناتے ہیں اور آپ آئین کے بجائے غیر قانونی آرڈرز کی پاسداری کر رہے ہیں۔ سینیٹر ہمایوں مہمند نے بھی پولیس کے رویے پر تنقید کرتے ہوئے اسے افسوسناک قرار دیا۔ پی ٹی آئی رہنماؤں کا موقف تھا کہ پولیس مسلسل عدالتی احکامات کی توہین کر رہی ہے اور وکیل کو اپنے موکل سے ملنے کی اجازت نہیں دی جا رہی۔