حامد خان کا وفاقی آئینی عدالت کو ماننے سے انکار؛ چیف جسٹس سے ججز ٹرانسفر کیس میں مداخلت کا مطالبہ

معروف قانون دان حامد خان نے میڈیا سے گفتگو کرتے ہوئے چیف جسٹس آف پاکستان کی جانب سے ججز کے تبادلوں پر اختلافی نوٹ لکھنے اور اس عمل کی مخالفت کرنے کے فیصلے کو سراہا ہے۔ انہوں نے کہا کہ اب چیف جسٹس کی ذمہ داری ہے کہ وہ اپنے عہدے کی حرمت کو برقرار رکھیں۔ حامد خان نے مطالبہ کیا کہ جو اقدامات انتظامی سطح پر نہیں ہو سکے، انہیں اب عدالتی کارروائی کے ذریعے یقینی بنایا جائے۔ انہوں نے لاہور ہائیکورٹ بار کی جانب سے ججز ٹرانسفر کے خلاف دائر درخواستوں کو منظور کرنے کی استدعا کرتے ہوئے کہا کہ چیف جسٹس خود ان کیسز کی سماعت کریں۔ حامد خان نے واضح کیا کہ وہ صرف سپریم کورٹ کو ہی واحد آئینی عدالت تسلیم کرتے ہیں اور وفاقی آئینی عدالت کو ایگزیکٹو کی عدالت قرار دیتے ہوئے اسے ماننے سے انکار کر دیا۔