وزیراعظم نے اپنا گھر سکیم کا اجرا کر دیا، اہل افراد میں چیک تقسیم

وزیراعظم شہباز شریف نے ‘وزیراعظم اپنا گھر سکیم’ کا باضابطہ اجرا کرتے ہوئے کامیاب امیدواروں میں بینک چیک تقسیم کر دیے ہیں۔ اس سکیم کے تحت مستحق افراد کو گھر کی تعمیر کے لیے ایک کروڑ روپے تک کا قرض 20 سال کی آسان اقساط پر فراہم کیا جا رہا ہے۔ افتتاحی تقریب سے خطاب کرتے ہوئے وزیراعظم نے کہا کہ عام آدمی کو چھت فراہم کرنا ریاست کا مقدس فریضہ ہے اور وہ اس منصوبے پر عملدرآمد کا ماہانہ بنیادوں پر خود جائزہ لیں گے۔ انہوں نے بتایا کہ پہلے سال 50 ہزار جبکہ مجموعی طور پر 5 لاکھ گھر بنانے کا منصوبہ ہے، جس سے نہ صرف بے گھر افراد کو چھت ملے گی بلکہ تعمیراتی شعبے سے وابستہ صنعتوں کے فروغ سے ملکی معیشت کا پہیہ بھی چلے گا۔ یہ سکیم چاروں صوبوں سمیت گلگت بلتستان اور آزاد کشمیر میں بھی نافذ العمل ہوگی۔