بشریٰ بی بی کی بیٹی کی درخواست پر رجسٹرار آفس کے اعتراضات دور

اسلام آباد ہائیکورٹ نے سابق وزیراعظم عمران خان کی اہلیہ بشریٰ بی بی کی اپنے ذاتی معالج اور اہلخانہ سے ملاقات سے متعلق درخواست پر رجسٹرار آفس کے اعتراضات دور کرتے ہوئے اسے پیر کو سماعت کے لیے مقرر کرنے کی ہدایت کر دی ہے۔ بشریٰ بی بی کی بیٹی مبشرہ کی جانب سے دائر درخواست پر سماعت کے دوران جسٹس ارباب محمد طاہر نے ریمارکس دیے کہ جیل حکام سے رجوع کرنا ضروری ہے، تاہم کیس کی نوعیت کے پیش نظر اسے پیر کو سنا جائے گا۔ بشریٰ بی بی کے وکیل سلمان اکرم راجہ نے عدالت کو بتایا کہ ان کی موکلہ کی طبیعت ناساز ہے اور حال ہی میں ان کی سرجری بھی ہوئی ہے، اس کے باوجود فیملی ملاقاتیں روک دی گئی ہیں۔ عدالت نے آج ہفتے کا آخری ورکنگ ڈے ہونے کے باعث فوری ریلیف کے بجائے پیر کو تفصیلی سماعت کا فیصلہ کیا ہے۔