پاکستان میں کرپشن بارے آئی ایم ایف رپورٹ معتصب، نامناسب ہے: چیئرمین نیب

قومی احتساب بیورو (نیب) کے چیئرمین لیفٹیننٹ جنرل (ر) نذیر احمد نے آئی ایم ایف کی کرپشن سے متعلق رپورٹ کو متعصب اور نامناسب قرار دیتے ہوئے مسترد کر دیا ہے۔ سینئر صحافیوں سے گفتگو کرتے ہوئے انہوں نے کہا کہ آئی ایم ایف، ورلڈ بینک اور ٹرانسپیرنسی انٹرنیشنل نے ایک ایسا “ٹرائیکا” بنا رکھا ہے جو مخصوص ممالک کے خلاف منفی ماحول پیدا کرتا ہے۔ انہوں نے واضح کیا کہ آئی ایم ایف کی رپورٹ کا ڈیٹا درست نہیں ہے، کیونکہ نیب نے 2026 کی پہلی سہ ماہی میں 2.962 ٹریلین روپے کی ریکارڈ ریکوری کی ہے، جو گزشتہ سال کے مقابلے میں 33 گنا زیادہ ہے۔ نیب حکام کے مطابق، اس مجموعی ریکوری میں 2950 ارب روپے سے زائد مالیت کی زمین واگزار کروائی گئی جبکہ پلی بارگین اور جرمانوں کی مد میں 11 ارب روپے سے زائد کی براہِ راست ریکوری بھی شامل ہے۔