زلزلوں سے بچاؤ کیلئے جدید تعمیراتی ٹیکنالوجی ناگزیر ہے: مریم نواز شریف

وزیر اعلیٰ پنجاب مریم نواز شریف نے زلزلہ متاثرین کے عالمی دن کے موقع پر اپنے خصوصی پیغام میں کہا ہے کہ جدید تعمیراتی ٹیکنالوجی اور مضبوط انفراسٹرکچر کے ذریعے قدرتی آفات کے خطرات سے مؤثر طور پر بچا جا سکتا ہے۔ انہوں نے 2005 کے زلزلے کے متاثرین کو خراجِ عقیدت پیش کرتے ہوئے کہا کہ حکومت متاثرہ خاندانوں کے غم میں برابر کی شریک ہے۔ مریم نواز نے بتایا کہ پنجاب حکومت جیوگرافک انفارمیشن سسٹمز اور سیٹلائٹ ماڈلنگ جیسے جدید نظام میں سرمایہ کاری کر رہی ہے، جبکہ ‘پاکستان اسکول سیفٹی فریم ورک’ کے تحت تعلیمی نصاب میں آفات سے متعلق آگاہی کے ابواب بھی شامل کیے گئے ہیں۔ انہوں نے اس عزم کا اعادہ کیا کہ حالیہ سیلاب کے دوران ریکارڈ وقت میں بحالی کی سرگرمیوں کی طرح مستقبل میں بھی عوام کے تحفظ کو یقینی بنایا جائے گا۔