بنوں میں رات گئے مزنگہ پولیس چوکی پر دہشت گردوں کا حملہ ناکام

بنوں میں پولیس کی بروقت اور مؤثر حکمتِ عملی کے باعث دہشت گردوں کا ایک بڑا حملہ ناکام بنا دیا گیا ہے۔ پولیس حکام کے مطابق، رات گئے دہشت گردوں کی بڑی تعداد نے ‘چوکی مزنگہ’ پر حملہ کیا، جس کا سیکیورٹی اہلکاروں نے فوری اور بھرپور جواب دیا۔ فجر تک جاری رہنے والے اس مقابلے کے بعد دہشت گرد بھاری نقصان اٹھاتے ہوئے پسپا ہو گئے۔ واقعے کے بعد ڈی پی او بنوں یاسر آفریدی کی قیادت میں تازہ دم نفری نے موقع پر پہنچ کر علاقے کا کنٹرول سنبھال لیا۔ سرچ آپریشن کے دوران دہشت گردوں کا چھوڑا ہوا اسلحہ، بینڈولیئرز اور دیگر سامان برآمد ہوا ہے، جبکہ مقابلے میں ایک کانسٹیبل فرید اللہ معمولی زخمی ہوئے۔ آئی جی خیبرپختونخوا ذوالفقار حمید نے جوانوں کی بہادری کو خراجِ تحسین پیش کرتے ہوئے عزم ظاہر کیا ہے کہ دہشت گردی کے مکمل خاتمے تک کارروائیاں جاری رہیں گی۔