ایران امریکا تنازع طے کرنے کےلیے پاکستان بہترین ثالثی کررہاہے، قطر

قطر کی وزارتِ خارجہ کے ترجمان ماجد الانصاری نے کہا ہے کہ ایران اور امریکاکے درمیان  تنازع کے خاتمے کے لیے پاکستان کی ثالثی کی کوششوں پر قطر اور پاکستان کے درمیان قریبی ہم آہنگی موجود ہے۔

ہفتہ وار پریس بریفنگ میں قطر کی وزارتِ خارجہ کے ترجمان ماجد الانصاری نے کہا کہ ہمیں مذاکرات کے دائرہ کار کو وسیع کرنے کی ضرورت نہیں، ہم پاکستانی ثالثی کی حمایت کرتے ہیں۔

ماجد الانصاری نے زور دیا کہ آبنائے ہرمز کودباؤ ڈالنے کے ہتھیارکے طور پر استعمال نہیں کیا جانا چاہیے۔

انہوں نے کہا کہ قطر تنازع کے خاتمے کے لیے جامع معاہدے کے حق میں ہے، خاص طور پر ان خبروں کے تناظر میں جن میں کہا جا رہا ہے کہ ایران آبنائے ہرمز کے معاملات کو جوہری مذاکرات سے الگ رکھنا چاہتا ہے۔ قطر کی بنیادی تشویش علاقائی سلامتی ہے، کیونکہ ایران کے حملوں نے خطے کے استحکام کو سوالیہ نشان بنا دیا ہے۔

انہوں نے واضح کیا کہ مسئلہ ثالث کا نہیں اور پاکستان اس ضمن میں بہترین کردار ادا کر رہا ہے۔ترجمان قطری وزارت خارجہ نے کہاکہ ہم اس عمل کی مکمل حمایت کرتے ہیں اور علاقائی و عالمی شراکت داروں کے ساتھ مسلسل رابطے میں ہیں۔ ہم بطور ثالث پاکستان کے مقصد میں اس کے ساتھ مکمل یکجہتی رکھتے ہیں۔