صدر آصف علی زرداری کا ماؤ زے تُنگ کے آبائی شہر کا دورہ؛ عظیم چینی رہنما کو خراجِ عقیدت پیش کیا

صدر مملکت آصف علی زرداری نے اپنے دورہ چین کے دوران چیئرمین ماؤ زے تُنگ کے آبائی شہر شاؤشان کا دورہ کیا، جہاں انہوں نے اسٹیچو اسکوائر پر چینی انقلاب کے بانی کے مجسمے پر پھولوں کا گلدستہ رکھا اور انہیں زبردست خراجِ عقیدت پیش کیا۔ صدر زرداری کا استقبال سینئر چینی حکام نے کیا، جنہوں نے انہیں ماؤ زے تُنگ کی ابتدائی زندگی، سیاسی جدوجہد اور جدید چین کی تشکیل میں ان کے کلیدی کردار پر تفصیلی بریفنگ دی۔ صدر نے ماؤ زے تُنگ میموریل میوزیم کا بھی دورہ کیا اور وہاں محفوظ تاریخی نوادرات اور تصاویر میں گہری دلچسپی لی۔ اس موقع پر صدر کا کہنا تھا کہ چین کی ترقی اور اتحاد میں چیئرمین ماؤ کی خدمات ناقابلِ فراموش ہیں اور ایسے تاریخی مقامات کا تحفظ قومی شعور کے لیے انتہائی اہمیت رکھتا ہے۔ وفد میں سینیٹر سلیم مانڈوی والا، شرجیل انعام میمن اور چین میں پاکستان کے سفیر خلیل ہاشمی سمیت دیگر اعلیٰ حکام بھی صدر کے ہمراہ تھے۔