بانی پی ٹی آئی کا پمز اسپتال میں دو گھنٹے تک طبی معائنہ؛ سحری کے وقت دوبارہ اڈیالہ جیل منتقل

اڈیالہ جیل میں اسیر بانی پی ٹی آئی کو معمول کے طبی معائنے کے لیے سخت سیکیورٹی میں پمز اسپتال اسلام آباد منتقل کیا گیا، جہاں ڈاکٹروں کی خصوصی ٹیم نے ان کا تفصیلی چیک اپ کیا۔ ذرائع کے مطابق، اسپتال میں تقریباً دو گھنٹے تک جاری رہنے والے اس معائنے میں وہی ڈاکٹرز شامل تھے جو پہلے بھی ان کا علاج کرتے رہے ہیں۔ طبی ٹیم نے بانی پی ٹی آئی کی آنکھوں کے پروسیجر اور مجموعی صحت کا جائزہ لیا، جس کی تفصیلی رپورٹ جلد جاری کی جائے گی۔ معائنے کے بعد صبح چار بجے سحری کے وقت انہیں دوبارہ اڈیالہ جیل منتقل کر دیا گیا ہے۔

بانی پی ٹی آئی کی آنکھوں کا کامیاب علاج؛ پمز انتظامیہ نے میڈیکل رپورٹ اور پریس ریلیز جاری کر دی

پمز اسپتال انتظامیہ نے بانی پی ٹی آئی عمران خان کی آنکھوں کے علاج کے حوالے سے تفصیلی پریس ریلیز جاری کر دی ہے، جس کے مطابق انہیں 28 اپریل کو فالو اپ معائنے کے لیے اسپتال لایا گیا تھا۔ انتظامیہ کا کہنا ہے کہ ماہرینِ چشم کے معائنے کے بعد آپریشن تھیٹر میں بانی پی ٹی آئی کو ‘اینٹی وی ای جی ایف’ (Anti-VEGF) انجکشن کی چوتھی ڈوز دی گئی۔ یہ تمام عمل مریض کی مکمل آگاہی اور رضامندی کے ساتھ ڈے کیئر سرجری کے طور پر انجام دیا گیا۔ رپورٹ کے مطابق ‘آپٹیکل کوہیرنس ٹوموگرافی’ میں ان کی بینائی میں واضح طبی بہتری پائی گئی ہے اور وہ علاج کے عمل کے دوران مکمل طور پر مستحکم رہے۔ طریقہ کار مکمل ہونے کے بعد انہیں ضروری ہدایات اور دستاویزی کارروائی کے ساتھ اسپتال سے ڈسچارج کر دیا گیا۔