اسلام آباد ہائیکورٹ کے 5 ججز کا تبادلہ، جوڈیشل کمیشن کا اجلاس آج ہوگا

اسلام آباد ہائیکورٹ کے پانچ ججز کے دیگر صوبائی ہائیکورٹس میں تبادلے کے معاملے پر جوڈیشل کمیشن کا اہم اجلاس آج چیف جسٹس یحییٰ آفریدی کی سربراہی میں منعقد ہوگا۔ ذرائع کے مطابق اجلاس میں جسٹس محسن اختر کیانی کا لاہور ہائیکورٹ اور جسٹس بابر ستار کا پشاور ہائیکورٹ تبادلہ زیرِ غور آئے گا۔ اسی طرح جسٹس ثمن رفعت امتیاز اور جسٹس خادم حسین سومرو کے سندھ ہائیکورٹ جبکہ جسٹس ارباب محمد طاہر کے بلوچستان ہائیکورٹ تبادلے سے متعلق معاملات کا بھی جائزہ لیا جائے گا۔ واضح رہے کہ ذرائع کا کہنا ہے کہ چیف جسٹس یحییٰ آفریدی نے ان تبادلوں کے لیے معمول کا اجلاس بلانے کی درخواست مسترد کر دی تھی، جس کے بعد اب یہ باضابطہ اجلاس طلب کیا گیا ہے۔

جوڈیشل کمیشن اجلاس سے قبل اہم پیش رفت؛ جسٹس بابر ستار کا چیف جسٹس یحییٰ آفریدی کو خط، ذاتی سماعت کی استدعا

اسلام آباد ہائیکورٹ کے ججز کے تبادلے سے متعلق جوڈیشل کمیشن کے اہم اجلاس سے قبل جسٹس بابر ستار نے چیف جسٹس پاکستان یحییٰ آفریدی کو خط لکھ دیا ہے۔ ذرائع کے مطابق، جسٹس بابر ستار نے بطور سربراہ جوڈیشل کمیشن لکھے گئے خط میں استدعا کی ہے کہ آرٹیکل 200 کے تحت ان کے تبادلے کے معاملے پر کوئی بھی فیصلہ کرنے سے قبل انہیں ذاتی طور پر سنا جائے۔ واضح رہے کہ آج ہونے والے جوڈیشل کمیشن کے اجلاس میں جن پانچ ججز کے تبادلوں کا معاملہ زیرِ غور ہے، ان میں جسٹس بابر ستار کا نام بھی شامل ہے۔ اس خط کے ذریعے انہوں نے مؤقف اختیار کیا ہے کہ تبادلے سے متعلق کمیشن کی کارروائی میں ان کا نکتہ نظر سنا جانا ضروری ہے۔