26 نومبر احتجاج کیس، علیمہ خان کی حاضری سے استثنیٰ کی درخواست منظور

راولپنڈی کی انسدادِ دہشت گردی عدالت (ATC) میں 26 نومبر کے احتجاج سے متعلق تھانہ صادق آباد میں درج مقدمے کی سماعت ہوئی، جس کے دوران عدالت نے اہم احکامات جاری کیے۔کیس کی سماعت جج امجد علی شاہ نے کی۔ سماعت کے آغاز پر وکیلِ صفائی نے ملزمہ علیمہ خان کی جانب سے ایک روزہ حاضری سے استثنیٰ کی درخواست دائر کی، جسے عدالت نے منظور کر لیا۔ عدالت نے کیس کے دیگر 10 ملزمان کو آئندہ سماعت پر ہر صورت پیش ہونے کی سخت ہدایت جاری کی ہے۔عدالت نے مقدمے کی کارروائی کو آگے بڑھاتے ہوئ کیس کے آخری گواہ کو شہادت کے لیے طلب کر لیا گیا ہے۔تفتیشی افسر انسپکٹر خلیل کو بھی آئندہ تاریخ پر ریکارڈ سمیت پیش ہونے کا حکم دیا گیا ہے۔

عدالت نے علیمہ خان اور دیگر ملزمان کے خلاف کیس کی مزید سماعت 4 مئی تک ملتوی کر دی ہے۔ واضح رہے کہ یہ مقدمہ 26 نومبر کو ہونے والے سیاسی احتجاج کے دوران مبینہ ہنگامہ آرائی اور قانون شکنی کے تناظر میں درج کیا گیا تھا جس کی سماعت اب اپنے آخری مراحل میں داخل ہو رہی ہے۔