عباس عراقچی کی دوبارہ اسلام آباد آمد، فیلڈ مارشل سے اہم مشاورت

ایرانی وزیر خارجہ عباس عراقچی نے اسلام آباد میں فیلڈ مارشل سید عاصم منیر سے چوبیس گھنٹوں کے دوران دوسری ملاقات کی ہے۔ ذرائع کے مطابق ملاقات میں خطے کی صورتحال، امن کوششوں اور باہمی امور پر تبادلہ خیال کیا گیا۔

عباس عراقچی مسقط سے اسلام آباد پہنچے، جبکہ اس سے قبل وہ جمعے کی رات بھی پاکستان آئے تھے۔ گزشتہ روز انہوں نے وزیراعظم شہباز شریف اور فیلڈ مارشل سید عاصم منیر سے ملاقاتیں کی تھیں۔

ذرائع کا کہنا ہے کہ ان ملاقاتوں کے بعد ایرانی وزیر خارجہ مسقط روانہ ہوگئے تھے، تاہم بعد ازاں دوبارہ اسلام آباد پہنچے اور مختصر قیام کے دوران اہم سیاسی اور عسکری شخصیات سے مشاورت کی۔

ذرائع کے مطابق ایرانی وزیر خارجہ دورہ مکمل کرنے کے بعد اسلام آباد سے ماسکو روانہ ہوگئے ہیں، جہاں وہ روسی قیادت سے اہم ملاقاتیں کریں گے۔