ایران امریکا مذاکرات کے تناظر میں امریکی ٹیموں کی واپسی جاری، جڑواں شہروں میں سکیورٹی ہائی الرٹ

ایران اور امریکا کے درمیان مجوزہ امن مذاکرات کے دوسرے مرحلے کے تناظر میں راولپنڈی اور اسلام آباد میں سکیورٹی ہائی الرٹ برقرار ہے جبکہ امریکی پیشگی ٹیموں کی مرحلہ وار واپسی جاری ہے۔

ذرائع کے مطابق مذاکراتی انتظامات کے سلسلے میں اسلام آباد آنے والی ایک امریکی ٹیم گزشتہ شب روانہ ہو چکی ہے جبکہ دوسری ٹیم اتوار کی صبح واپس روانہ ہوگئی۔

اطلاعات کے مطابق باقی ٹیموں کی روانگی بھی مرحلہ وار جاری ہے اور سکیورٹی ادارے تمام نقل و حرکت کی نگرانی کر رہے ہیں۔

ٹیموں کی آمد و رفت کے دوران جڑواں شہروں میں سخت حفاظتی انتظامات کیے گئے جبکہ بعض مقامات پر ٹریفک کی جزوی بندش اور راستوں میں تبدیلیاں بھی کی گئیں۔

ذرائع کا کہنا ہے کہ فیض آباد بس ٹرمینل کو عارضی طور پر بند رکھا گیا جبکہ ایکسپریس شاہراہ پر ٹریفک معمول پر لانے کے اقدامات جاری ہیں۔

دوسری جانب ایرانی وزیر خارجہ عباس عراقچی کی مسقط سمیت دیگر مصروفیات کے بعد اسلام آباد واپسی بھی متوقع بتائی جا رہی ہے۔