سولر صارفین سے فیس وصولی پر نظرثانی کا فیصلہ، 25 کلوواٹ تک رعایت کی سفارش

پاور ڈویژن نے سولر صارفین سے فیس وصولی کے معاملے پر نظرثانی کا فیصلہ کرتے ہوئے چھوٹے صارفین کے لیے ریلیف دینے کی تجویز پیش کردی ہے۔

وزیر توانائی اویس لغاری نے پچیس کلوواٹ تک سولر صارفین سے فیس ختم کرنے کی سفارش کرتے ہوئے کہا ہے کہ ایسے اقدامات قابل تجدید توانائی کے فروغ میں رکاوٹ بن سکتے ہیں۔

پاور ڈویژن نے نیپرا کو باضابطہ درخواست ارسال کرتے ہوئے لائسنس فیس کی شرط ختم کرنے کا مطالبہ کیا ہے جبکہ نئے قواعد پر تحفظات بھی ظاہر کیے گئے ہیں۔

ذرائع کے مطابق پاور ڈویژن نے دو ہزار پندرہ کے سابق سولر ضوابط بحال کرنے کی تجویز بھی دی ہے۔

ادھر سولر صنعت سے وابستہ حلقوں نے نئے ضابطوں کو مسترد کرتے ہوئے کہا ہے کہ غیر ضروری دفتری رکاوٹیں کاروبار اور صارفین دونوں کے لیے مسائل پیدا کر رہی ہیں۔

گرمی کی شدت میں اضافے کے ساتھ سولر نظام کی طلب میں بھی اضافہ ہوگیا ہے جبکہ بازار میں سولر پینلز اور متعلقہ آلات کی قیمتیں بڑھ گئی ہیں۔