صومالیہ کے قریب بحری قزاقوں کا جہاز پر قبضہ، یرغمالیوں میں 11 پاکستانی شامل

صومالیہ کے قریب بحری قزاقوں نے ایک تجارتی جہاز پر حملہ کرکے عملے کے افراد کو یرغمال بنا لیا، یرغمالیوں میں گیارہ پاکستانی شہری بھی شامل ہیں۔

ذرائع کے مطابق جہاز میں مالک سمیت مجموعی طور پر پچیس افراد سوار تھے جنہیں مسلح افراد نے قبضے میں لے لیا۔

یرغمال بنائے گئے افراد میں کراچی سے تعلق رکھنے والے بیالیس سالہ یاسر خان بھی شامل ہیں۔

یاسر خان کی اہلیہ نے بتایا کہ جہاز پر حملے کا واقعہ اکیس اپریل کو رپورٹ ہوا تھا اور آخری بار اسی روز ان سے رابطہ ہوا۔

انہوں نے کہا کہ یاسر خان نے بتایا تھا کہ عملے کے افراد تین روز سے بھوکے ہیں جبکہ جہاز پر مسلح افراد موجود ہیں۔

اہل خانہ نے حکومت پاکستان سے فوری مدد کی اپیل کرتے ہوئے مطالبہ کیا ہے کہ پاکستانی شہریوں کی جلد محفوظ واپسی یقینی بنائی جائے۔