وزیراعظم شہباز شریف سے ایرانی وزیرِ خارجہ عباس عراقچی کی ملاقات، علاقائی سلامتی پر اہم مشاورت

وزیراعظم محمد شہباز شریف سے ایران کے وزیرِ خارجہ عباس عراقچی نے وفد کے ہمراہ وزیراعظم ہاؤس میں اہم ملاقات کی، جس میں خطے کی مجموعی صورتحال اور دوطرفہ تعلقات پر تفصیلی تبادلہ خیال کیا گیا۔ اس اعلیٰ سطحی ملاقات میں نائب وزیراعظم و وزیرِ خارجہ سینیٹر محمد اسحاق ڈار اور چیف آف ڈیفنس فورسز فیلڈ مارشل سید عاصم منیر بھی وزیراعظم کے ہمراہ شریک تھے۔ ملاقات کے دوران مشرقِ وسطیٰ کی تازہ ترین صورتحال، علاقائی امن و استحکام اور پاکستان و ایران کے درمیان سکیورٹی تعاون کو مزید مستحکم بنانے سے متعلق امور زیرِ بحث آئے۔ذرائع کے مطابق، وزیراعظم شہباز شریف نے خطے میں کشیدگی کم کرنے کے لیے پاکستان کے اصولی موقف کا اعادہ کیا، جبکہ ایرانی وزیرِ خارجہ نے علاقائی امن کے لیے پاکستان کی مخلصانہ کوششوں اور میزبانی کو سراہا۔ یہ ملاقات ایک ایسے وقت میں ہوئی ہے جب پاکستان خطے میں قیامِ امن کے لیے ایران اور امریکہ کے درمیان سہولت کاری کا اہم کردار ادا کر رہا ہے۔