تحریک انصاف کا پیٹرولیم مصنوعات کی قیمتوں میں اضافے پر شدید ردعمل،حالیہ اضافے کو مسترد کر دیا

پاکستان تحریک انصاف (پی ٹی آئی) نے پیٹرولیم مصنوعات کی قیمتوں میں حالیہ اضافے کو “معاشی حملہ” قرار دیتے ہوئے اسے قطعی طور پر مسترد کر دیا ہے۔ پارٹی ترجمان کی جانب سے جاری بیان میں کہا گیا ہے کہ اس بے رحم فیصلے نے پہلے سے مہنگائی کے بوجھ تلے دبی ہوئی عوام کی کمر توڑ کر رکھ دی ہے۔

ترجمان پی ٹی آئی کے مطابق ملک میں مہنگائی تاریخ کی بلند ترین سطح پر پہنچ چکی ہے، جہاں آٹا، چینی، بجلی اور گیس جیسی بنیادی ضرورتیں پہلے ہی عام آدمی کی پہنچ سے باہر تھیں، اب پیٹرول کی قیمتوں نے متوسط طبقے کو بھی غربت کی لکیر سے نیچے دھکیل دیا ہے۔ بیان میں کہا گیا کہ لاکھوں خاندان دو وقت کی روٹی کے لیے تڑپ رہے ہیں، جبکہ تنخواہوں میں جمود اور اشیائے ضروریہ کی بڑھتی قیمتوں نے غریب کے لیے بقا کی جنگ مشکل بنا دی ہے۔

حکومت کو شدید تنقید کا نشانہ بناتے ہوئے پی ٹی آئی نے الزام عائد کیا کہ “نااہل حکمران” زمینی حقائق سے نظریں چرا کر صرف اعداد و شمار کی ہیر پھیر اور آئی ایم ایف کی غلامی میں مصروف ہیں۔ پارٹی نے مطالبہ کیا ہے کہ پیٹرولیم مصنوعات کی قیمتوں میں اضافہ فوری طور پر واپس لیا جائے اور مہنگائی پر قابو پانے کے لیے ہنگامی اقدامات کیے جائیں۔ پی ٹی آئی نے عزم ظاہر کیا ہے کہ وہ عوام کے حقوق کے لیے ہر سطح پر بھرپور جدوجہد جاری رکھے گی۔