بھکر: اراضی تنازع پر فائرنگ، 2 بھائیوں سمیت 5 افراد جاں بحق، 3 زخمی

بھکر کی بستی چانڈیا میں اراضی کے دیرینہ تنازع نے خونی تصادم کی شکل اختیار کر لی، جس کے نتیجے میں دو سگے بھائیوں سمیت 5 افراد جاں بحق اور 3 شدید زخمی ہو گئے۔ پولیس حکام کے مطابق فائرنگ کا واقعہ زمین کی ملکیت پر جاری جھگڑے کے باعث پیش آیا۔

ابتدائی تحقیقات میں انکشاف ہوا ہے کہ ملزمان اور مقتولین آپس میں قریبی رشتہ دار ہیں، تاہم زمین کے تنازع نے ذاتی دشمنی کی صورت اختیار کر لی تھی۔ واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور لاشوں و زخمیوں کو قریبی ہسپتال منتقل کر دیا گیا۔ پولیس نے علاقے کی ناکہ بندی کر کے واقعے کی باقاعدہ تحقیقات اور ملزمان کی گرفتاری کے لیے چھاپوں کا آغاز کر دیا ہے۔