پٹرولیم مصنوعات مہنگی کرنا غریب دشمنی ہے، لیوی فوری ختم کی جائے: حافظ نعیم الرحمن

امیر جماعت اسلامی حافظ نعیم الرحمن نے پٹرول اور ڈیزل کی قیمتوں میں حالیہ اضافے کو مسترد کرتے ہوئے اسے متوسط اور غریب طبقے کے لیے کمر توڑ بوجھ قرار دیا ہے۔ سوشل میڈیا پلیٹ فارم ‘ایکس’ پر جاری اپنے بیان میں انہوں نے کہا کہ حکومت کو چاہیے تھا کہ وہ پٹرولیم لیوی اور ناجائز ٹیکسوں کا خاتمہ کرتی، لیکن اس کے برعکس قیمتوں میں مزید اضافہ کر دیا گیا ہے۔

حافظ نعیم الرحمن کا کہنا تھا کہ پہلے ہی مہنگی بجلی اور گیس نے عوامی زندگی اجیرن کر رکھی ہے اور اب پٹرولیم مصنوعات پر مزید “ہتھوڑے” چلائے جا رہے ہیں جو کسی صورت قبول نہیں۔ انہوں نے خبردار کیا کہ اس فیصلے سے نہ صرف مہنگائی کا نیا طوفان آئے گا بلکہ ملک کی صنعتیں اور کاروبار بھی تباہ ہو کر رہ جائیں گے۔

امیر جماعت اسلامی نے مطالبہ کیا کہ حکومت ہوش کے ناخن لے، فوری طور پر پٹرولیم لیوی ختم کرے اور قیمتوں میں کیا گیا حالیہ اضافہ واپس لے تاکہ عوام کو کچھ ریلیف میسر آ سکے۔