صدر زرداری کا دورہ چین: سی پیک اور اقتصادی تعاون پر خصوصی توجہ، تزویراتی شراکت داری مزید مستحکم ہوگی

اسلام آباد: صدر مملکت آصف علی زرداری چینی حکومت کی خصوصی دعوت پر 25 اپریل سے یکم مئی تک چین کا اہم سرکاری دورہ کر رہے ہیں۔ ترجمان دفترِ خارجہ کے مطابق، یہ دورہ پاک چین سفارتی تعلقات کے 75 سال مکمل ہونے کی مناسبت سے انتہائی اہمیت کا حامل ہے۔

ترجمان نے دورے کی تفصیلات بتاتے ہوئے کہا کہ صدر زرداری 25 سے 27 اپریل تک صوبہ ہونان کے شہر ‘چانگشا’ میں قیام کریں گے، جبکہ دورے کے دوسرے مرحلے میں وہ 28 اپریل سے یکم مئی تک ‘سانیا’ کا دورہ کریں گے۔

اس دورے کے دوران صدر مملکت چینی صوبائی قیادت سے ملاقاتیں کریں گے جن میں دوطرفہ تعلقات اور باہمی دلچسپی کے امور پر تبادلہ خیال کیا جائے گا۔ ترجمان کے مطابق، ان ملاقاتوں میں پاک چین اقتصادی و تجارتی تعاون اور سی پیک (CPEC) کے منصوبوں پر خصوصی توجہ دی جائے گی۔ اس اعلیٰ سطح کے تبادلے کا مقصد پاک چین سدا بہار تزویراتی تعاون پر مبنی شراکت داری کو مزید مستحکم بنانا ہے۔