ایرانی وزیر خارجہ عباس عراقچی کی اسلام آباد آمد،اسحاق ڈار اور فیلڈ مارشل نے استقبال کیا

ایران کے وزیر خارجہ عباس عراقچی اعلیٰ سطحی وفد کے ہمراہ اسلام آباد پہنچ گئے ہیں، جہاں وہ پاکستانی قیادت سے اہم ملاقاتیں کریں گے۔

دفتر خارجہ کے مطابق ایرانی وفد کی آمد پر نائب وزیراعظم اسحاق ڈار اور فیلڈ مارشل عاصم منیر نے استقبال کیا۔ دورے کے دوران عباس عراقچی وزیراعظم شہباز شریف سے ملاقات کریں گے جبکہ نائب وزیراعظم اسحاق ڈار سے بھی تفصیلی بات چیت متوقع ہے۔

ذرائع کے مطابق ملاقاتوں میں دوطرفہ تعلقات، سرحدی تعاون، تجارتی روابط اور خطے کی مجموعی صورتحال پر تبادلہ خیال کیا جائے گا۔

ایرانی وزیر خارجہ نے اپنے بیان میں کہا تھا کہ پڑوسی ممالک ایران کی خارجہ پالیسی میں اولین ترجیح رکھتے ہیں، اسی سلسلے میں اسلام آباد کا دورہ نہایت اہم ہے۔

بعد ازاں عباس عراقچی مسقط اور ماسکو کا بھی دورہ کریں گے، جہاں علاقائی پیش رفت اور سفارتی امور پر مشاورت کی جائے گی۔