کراچی میں نوجوان سے ڈیجیٹل اکاؤنٹ کے ذریعے ہزاروں ڈالرز لوٹ لیے گئے

کراچی میں اغوا برائے تاوان کی وارداتوں نے نیا رخ اختیار کرلیا، جہاں ملزمان نے ایک نوجوان کو اغوا کر کے اس کے ڈیجیٹل اکاؤنٹ سے بڑی رقم منتقل کرالی۔

تفصیلات کے مطابق متاثرہ نوجوان متعال خان ایئرپورٹ جانے کیلئے گھر سے روانہ ہوئے تھے کہ راستے میں مسلح افراد نے ان کی گاڑی کو روک کر انہیں زبردستی اپنے ساتھ لے لیا۔ ملزمان نے انہیں ایک جھوٹے الزام میں الجھا کر یرغمال بنایا اور ان کا موبائل فون قبضے میں لے لیا۔

نوجوان کے مطابق ملزمان نے ان کے ڈیجیٹل اکاؤنٹ سے آٹھ ہزار چھ سو امریکی ڈالرز اپنے اکاؤنٹ میں منتقل کیے اور مزید رقم حاصل کرنے کیلئے ان کے قریبی افراد سے بھی رابطہ کیا۔

متاثرہ شہری نے بتایا کہ ملزمان نے انہیں شدید ذہنی اور جسمانی دباؤ میں رکھا اور کچھ وقت بعد کورنگی کے علاقے میں چھوڑ کر فرار ہوگئے۔ واردات کے دوران ان سے موبائل فون اور دیگر سامان بھی چھین لیا گیا۔

پولیس حکام کا کہنا ہے کہ واقعے کا مقدمہ درج کر لیا گیا ہے اور مزید تحقیقات جاری ہیں تاکہ ملزمان کو گرفتار کیا جا سکے۔