اے این پی کا پختونخوا اسمبلی اجلاس سٹیڈیم میں بلانے پر بائیکاٹ کا فیصلہ

عوامی نیشنل پارٹی (اے این پی) نے خیبر پختونخوا اسمبلی کا اجلاس اسٹیڈیم میں منعقد کرنے کے صوبائی حکومت کے فیصلے کو مسترد کرتے ہوئے اس سے مکمل بائیکاٹ کا اعلان کر دیا ہے۔ اے این پی کے صوبائی صدر میاں افتخار حسین نے اس اقدام کو “نمائشی سرگرمی” اور “نیا ڈرامہ” قرار دیتے ہوئے صوبائی حکومت کو کڑی تنقید کا نشانہ بنایا ہے۔ ان کا موقف ہے کہ جب صوبہ امن و امان کی خراب صورتحال اور سنگین عوامی مسائل سے دوچار ہے، ایسے میں اسمبلی ہال کے بجائے اسٹیڈیم میں اجلاس بلانا محض وسائل کا ضیاع اور عوام کو گمراہ کرنے کی کوشش ہے۔

میاں افتخار حسین نے سوال اٹھایا کہ کھیل کے میدانوں کو سیاسی مقاصد کے لیے استعمال کرنے کے بجائے کھیلوں کے فروغ کے لیے وقف ہونا چاہیے۔ انہوں نے مزید کہا کہ اگر حکومت کا مقصد عوام کو پارلیمانی کارروائی دکھانا ہے تو یہ کام پہلے ہی لائیو نشریات کے ذریعے ہو رہا ہے، اس کے لیے بھاری اخراجات کے ساتھ اسٹیڈیم میں سیٹ اپ لگانا غیر منطقی ہے۔