پاک بحریہ کا فضا سے سطح سمندر پر مار کرنے والے تیمور کروز میزائل کا کامیاب تجربہ

پاکستان کی بحری دفاعی صلاحیتوں میں ایک اور تاریخی سنگِ میل کا اضافہ ہوا ہے، جہاں پاک بحریہ نے مقامی طور پر تیار کردہ فضا سے سطحِ سمندر پر مار کرنے والے جدید کروز میزائل ‘تیمور’ کا کامیاب تجربہ مکمل کر لیا ہے۔ آئی ایس پی آر کے مطابق، اس تجربے کے دوران میزائل کو فضا سے فائر کیا گیا جس نے سمندر میں موجود اپنے ہدف کو انتہائی درستگی کے ساتھ نشانہ بنایا۔ یہ کامیاب فائرنگ پاک بحریہ کی آپریشنل تیاریوں اور سمندر میں طویل فاصلے تک دشمن کے اہداف کو تباہ کرنے کی صلاحیت کا واضح ثبوت ہے۔

میزائل ‘تیمور’ کی کامیاب شمولیت سے مسلح افواج کی کثیرالجہتی مربوط دفاعی صلاحیتوں کو مزید تقویت ملی ہے۔ صدرِ مملکت آصف علی زرداری، وزیراعظم شہباز شریف، چیف آف ڈیفنس فورسز فیلڈ مارشل عاصم منیر، ایئر چیف مارشل ظہیر احمد بابر سدھو اور امیر البحر ایڈمرل نوید اشرف نے اس عظیم کامیابی پر پاکستانی سائنسدانوں اور انجینئرز کی انتھک محنت کو سراہتے ہوئے انہیں مبارکباد پیش کی ہے۔