خلیجی ممالک کیلئے 45 پروازیں منسوخ، فضائی آپریشن متاثر

پاکستان کے مختلف ہوائی اڈوں سے خلیجی ممالک کے لیے فضائی آپریشن شدید متاثر ہوا ہے، جہاں مسافروں کی عدم دستیابی اور علاقائی صورتحال کے باعث مجموعی طور پر 45 پروازیں منسوخ کر دی گئی ہیں۔ ایئرپورٹ ذرائع کا کہنا ہے کہ اسلام آباد میں جاری ایران اور امریکہ کے درمیان حساس مذاکرات اور بدلتی ہوئی جیو پولیٹیکل صورتحال نے فضائی سرگرمیوں پر گہرے اثرات مرتب کیے ہیں۔ خاص طور پر متحدہ عرب امارات (UAE) جانے اور وہاں سے آنے والے مسافروں کی تعداد میں اچانک غیر معمولی کمی دیکھی جا رہی ہے، جس کے باعث ایئر لائنز مطلوبہ تعداد پوری نہ ہونے پر پروازیں منسوخ کرنے پر مجبور ہیں۔

منسوخ ہونے والی پروازوں میں سب سے زیادہ متاثر کراچی ایئرپورٹ ہوا ہے جہاں سے 18 پروازیں منسوخ ہوئیں، جبکہ اسلام آباد سے 12، لاہور سے 9 اور پشاور سے 6 پروازیں آپریٹ نہ ہو سکیں۔ ان پروازوں میں دبئی، ابوظہبی، شارجہ، بحرین، کویت اور فجیرہ جیسے اہم روٹس شامل ہیں۔