پاکستان نے امن کیلئے کردار ادا کیا، امریکا ناقابلِ اعتماد، مذاکرات میں شرکت کا کوئی ارادہ نہیں: ایران

ایران کی اعلیٰ قیادت اور وزارتِ خارجہ کی جانب سے امریکہ کے ساتھ اسلام آباد مذاکرات کے حوالے سے انتہائی محتاط اور سخت موقف سامنے آیا ہے، جس میں سفارت کاری کے دروازے کھلے رکھنے کے باوجود واشنگٹن پر شدید عدم اعتماد کا اظہار کیا گیا ہے۔ ایرانی وزارتِ خارجہ کے ترجمان اسماعیل بقائی نے دوٹوک الفاظ میں واضح کیا ہے کہ ایران کو امریکہ پر رتی برابر بھروسہ نہیں کیونکہ اس نے بحری ناکہ بندی، ایرانی جہاز پر حملے اور لبنان جنگ بندی کی خلاف ورزیوں کے ذریعے ثابت کر دیا ہے کہ وہ امن کے لیے سنجیدہ نہیں ہے۔ ترجمان کے مطابق، موجودہ حالات میں مذاکرات کے دوسرے دور میں شرکت کا تاحال کوئی ارادہ نہیں ہے، تاہم پاکستان کی جانب سے امن کے لیے ادا کیے گئے مخلصانہ کردار کی قدر کی جاتی ہے۔

دوسری جانب، ایرانی پارلیمنٹ کی قومی سلامتی کمیٹی کے سربراہ ابراہیم عزیزی اور اسپیکر محمد باقر قالیباف کا موقف تہران کی “مذاکرات بھی اور تیاری بھی” کی پالیسی کی عکاسی کرتا ہے۔ ابراہیم عزیزی کا کہنا ہے کہ مذاکرات دراصل میدانِ جنگ کا تسلسل ہیں اور ایران کسی بھی قیمت پر اپنی ‘ریڈ لائنز’ اور قومی مفادات پر سمجھوتہ نہیں کرے گا۔ انہوں نے اسلام آباد ٹیم بھیجنے کو امریکی رویے میں مثبت تبدیلی سے مشروط کیا ہے۔ اسی طرح باقر قالیباف نے واضح کیا کہ ایران دشمن پر بھروسہ کیے بغیر ہر قسم کے خطرات سے نمٹنے کے لیے مکمل طور پر تیار ہے، کیونکہ جنگ کسی بھی لمحے شدت اختیار کر سکتی ہے۔ ماہرین ان بیانات کو خطے میں بڑھتی ہوئی کشیدگی اور امریکی بحری ناکہ بندی کے جواب میں ایران کی ایک دفاعی اور سفارتی حکمتِ عملی قرار دے رہے ہیں۔