بغیر اجازت نئی یونیورسٹی یا سب کیمپس کے قیام پر فوری پابندی عائد

ہائر ایجوکیشن کمیشن (HEC) نے ملک بھر میں اعلیٰ تعلیم کے گرتے ہوئے معیار کو بچانے کے لیے ایک بڑا اور سخت فیصلہ کیا ہے، جس کے تحت بغیر اجازت نئی یونیورسٹیوں یا سب کیمپسز کے قیام پر فوری پابندی عائد کر دی گئی ہے۔ ایچ ای سی نے تمام جامعات کے وائس چانسلرز اور سربراہان کو باقاعدہ خط لکھ کر واضح کر دیا ہے کہ اب کمیشن کی پیشگی اجازت اور مکمل جانچ پڑتال (Scrutiny) کے بغیر کوئی بھی نیا تعلیمی ادارہ یا ذیلی کیمپس کام شروع نہیں کر سکے گا۔

اس فیصلے کی بنیادی وجہ تحصیل کی سطح پر کھلنے والے کیمپسز میں پی ایچ ڈی اساتذہ کی عدم دستیابی، غیر معیاری انفراسٹرکچر اور سہولیات کا فقدان ہے۔ ایچ ای سی نے خبردار کیا ہے کہ اس پالیسی کی خلاف ورزی کرنے والے اداروں کو نہ تو این او سی جاری کیا جائے گا اور نہ ہی ان کی ڈگریوں کی تصدیق کی جائے گی۔