چین کی بے مثال ترقی دنیا کیلئے ایک روشن مثال ہے: مریم نواز

وزیراعلیٰ پنجاب مریم نواز شریف نے چینی زبان کے عالمی دن کے موقع پر اپنے خصوصی پیغام میں چین کی ترقی کو دنیا کے لیے ایک روشن مثال قرار دیتے ہوئے کہا ہے کہ چینی زبان اب عالمی منظر نامے میں کلیدی اہمیت اختیار کر چکی ہے۔ انہوں نے چینی عوام کو مبارکباد دیتے ہوئے اس بات پر زور دیا کہ اقوام متحدہ کی چھ سرکاری زبانوں میں شامل یہ زبان پاکستان اور چین کی لازوال دوستی کو مزید مضبوط بنانے کا ایک اہم ذریعہ ہے۔

مریم نواز کا کہنا تھا کہ دنیا بھر میں تقریباً سوا ارب افراد چینی زبان بولتے ہیں اور چین کی سیاسی، سفارتی و معاشی اہمیت کو پوری دنیا تسلیم کرتی ہے۔ انہوں نے پنجاب پولیس کے حوالے سے ایک اہم معلومات شیئر کرتے ہوئے بتایا کہ چینی باشندوں کی سکیورٹی پر مامور اہلکاروں کو چینی زبان سکھائی جاتی ہے تاکہ باہمی رابطے اور سکیورٹی کے عمل کو مزید بہتر بنایا جا سکے۔ وزیراعلیٰ نے مزید کہا کہ چین کی وسیع مارکیٹ سے فائدہ اٹھانے اور چینی ثقافت کو سمجھنے کے لیے اس زبان میں مہارت حاصل کرنا وقت کی ضرورت ہے۔